બિપિન પટેલની વાર્તાઓ — અનુઆધુનિક ગુજરાતી વાર્તાસંપદા શ્રેણી

બિપિન પટેલનો જન્મ ૧લી જુલાઈ, ૧૯૫૩ના રોજ વતનના ગામ દેત્રોજમાં થયો હતો. તેમણે અંગ્રેજી-સંસ્કૃત વિષયો સાથે બી.એ., બી.એડ. કર્યું છે. સચિવાલયના વિવિધ વિભાગોમાં સેવા આપીને ઉપસચિવ તરીકે તે સ્વૈછિક નિવૃત્ત થયા છે અને હાલ અમદાવાદમાં રહે છે.

તેમના ત્રણ વાર્તાસંગ્રહો છે. જે ‘દશ્મન’ (૧૯૯૯), ‘જે કોઈ પ્રેમ અંશ’ (૨૦૦૮) અને ‘વાંસનાં ફૂલ’ (૨૦૧૭) છે. તેમણે ‘નવલિકા ચયન’ ૧૯૯૮નું સંપાદન કરેલું છે. એમની વાર્તા ‘ગ્રહણ’ને સુપ્રસિદ્ધ ‘કથા’ એવૉર્ડ મળ્યો છે. તેમના વાર્તાસંગ્રહ ‘જે કોઈ પ્રેમ અંશ’ને વર્ષ ૨૦૦૮-૯-૧૦નો ધૂમકેતુ નવલિકા પુરસ્કાર મળ્યો છે.

તેમણે અંગ્રેજી-ગુજરાતી અનુવાદો ‘અસૂયા’ શીર્ષકથી (પ્રસિદ્ધ ફ્રેંચ લેખક જ્યોર્જ સીમેનોન કૃત ‘ધ ડોર’ નવલકથા), બસવેશ્વરનું ટૂંકું જીવનચરિત્ર, વિશ્વ પ્રસિદ્ધ વાર્તાકારો એન્તોન ચેખોવ, મિલાન કુન્દેરા, જેમ્સ જોયસની વાર્તાઓ તથા ભારતીય ભાષાઓની વાર્તાઓના અનુવાદ પણ કર્યો છે.

ગુજરાતી-અંગ્રેજી અનુવાદ; પ્રસિદ્ધ કવિ વિવેચક સ્વ. લાભશંકર ઠાકરના નાટક ‘વૃક્ષ’નો ‘ઘ્EE’ નામે અનુવાદ કર્યો છે, જે ‘Nit India Through Literature’ પુસ્તકમાં સમાવિષ્ટ છે.

કિરીટ દૂધાતનો જન્મ અમરેલી જિલ્લાના મોટા આંકડિયા ગામે તા. ૧/૧/૧૯૬૧ના રોજ થયો હતો. એમનું વતન અમરેલી જિલ્લાનું મોટા કણકોટ ગામ છે. એમનું માધ્યમિક શિક્ષણ મોસાળના ગામ કેરિયાચાડમાં થયું અને બાકીનું શિક્ષણ અમદાવાદ ખાતે મેળવ્યું છે. એમણે અંગ્રેજી સાહિત્યમાં અનુસ્નાતકની પદવી મેળવી છે. ૧૯૮૦માં સચિવાલય ગાંધીનગર ખાતે કારકુનની નોકરીમાં દાખલ થયા બાદ ૧૯૮૯માં નાયબ કલેક્ટરમાં જોડાયા. ૨૦૧૩માં સ્વૈચ્છિક નિવૃત્તિ લઈને હાલ અમદાવાદ ખાતે વસે છે.

એમણે મુખ્યત્વે ટૂંકી વાર્તાના સ્વરૂપમાં ખેડાણ કર્યું છે. ‘બાપાની પીંપર’ (૧૯૯૮) અને ‘આમ થાકી જવું’ (૨૦૦૮) એમના વાર્તાસંગ્રહો છે. એમણે ઘનશ્યામ દેસાઈ અને ચુનીલાલ મડિયાની ઉત્તમ વાર્તાઓનું સંપાદન કર્યું છે. તથા ૧૯૮૪ની ઉત્તમ વાર્તાઓનું સંપાદન કર્યું છે. હાલ તે ‘એતદ્‌’ નામના સામાયિકમાં સહસંપાદક તરીકે કામગીરી બજાવે છે.

એમને ઉમાશંકર પારિતોષિક, ધૂમકેતુ પારિતોષિક, ગુજરાતી સાહિત્ય પરિષદનું તખ્તસિંહ પરમાર પારિતોષિક તેમજ ગુજરાત સાહિત્ય અકાદમીનું શ્રેષ્ઠ વાર્તાસંગ્રહ માટે પારિતોષિક મળેલાં છે.